Rook, vure en dwelms: Mineralia-inwoners leef in vrees
Rook, onwettige vullisverbranding en beweerde dwelmaktiwiteite by die park op die hoek van Vos- en Jeppe-straat in Mineralia wek groot kommer, met ouers wat vrees vir hul kinders se gesondheid.
Inwoners is raadop oor die aanhoudende rumoer, beweerde dwelmgebruik en onwettige vullisstorting by die park langs ’n plaaslike karwas.
Zania Janse van Rensburg, ’n inwoner van die area, sê diepark word byna daagliks as ’n stortingsterrein gebruik. “Die vuilgoed word net uitgegooi en gelos. Dit is ongesond en onveilig,” vertel sy.
Die grootste skok het Vrydagoggend, 26 Desember, omstreeks 09:00 gekom toe vullis by ’n Wendyhuis-toilet aan die brand gesteek is. “Die rook het direk ons huis binnegetrek,” sê sy. “Ek het ’n klein seuntjie wat eers ’n jaar gelede van sy asmamedikasie af is. Om te sien hoe hy daardie rook inasem, laat ’n mens sidder. Jy wonder nie of dit gevaarlik is nie – jy wéét dit is.”
Sy voeg by dat glasbottels gereeld in die vure gegooi word en met harde knalle ontplof.
Volgens inwoners hou die onrus snags aan. “Tussen 23:00 en 05:00 slaap ons nie. Die honde blaf aanhoudend terwyl mense by die toilet rondbeweeg,” sê Zania.
Die polisie is reeds verskeie kere gekontak, maar geen blywende oplossing het tot dusver gevolg nie. Onder ’n boom oorkant die pad word daagliks gedrink en beweerdelik dwelms gebruik, met leë drankbottels oral gestrooi en gebruikte naalde wat oop en bloot lê.
Die gemeenskap vra nou dringend: Hoe lank moet gesinne nog só leef voordat daar ingegryp word?
KAART: https://maps.app.goo.gl/oEKSLDSaCsLVuzmG9?g_st=com.google.maps.preview.copy
@middelburgobserver KYK: Rook, vure en dwelms: Mineralia-inwoners leef in vrees Rook, onwettige vullisverbranding en beweerde dwelmaktiwiteite by die park op die hoek van Vos- en Jeppe-straat in Mineralia wek groot kommer, met ouers wat vrees vir hul kinders se gesondheid. Lees meer: #Mpumalanga #Middelburg #MiddelburgObserver #stevetshwetelocalmunicipality #Middelburgmusicschool
