’n Padteken vir paddas!Maar daar is ook padteken vir uile, tarentale en hase.

Op ’n tyd was daar selfs ’n padteken vir ganse.

Verkeersman Fred van Rensburg, Middelburg se burgemeester en inwoners was daar toe die gansteken opgerig is in Helen Josephstraat.

Maar toe vreet ’n polisieman se hond die ganse op, geen gans, geen ganspadteken.

Nou wonder die dorp se inwoners of daar nie ’n padteken vir hoenders moet wees nie?

Verkeer is Saterdagoggend weer in Wesstraat ontwrig, toe ’n hen en haar vyf kuikens op hulle oggendstappie gegaan het.

En nee, henne steur hulle nie aan padreëls nie.

Die kuikens het hier gepik-pik en daar gepik-pik, terwyl motoriste om hulle moes ry.

Daar is vier groepe hoenders; die Midwater Kentucky hoenders, die Kanonkop Spar hoenders, Kentucky Cowen Ntulistraat hoenders en die Wesstraat troppie.

Waar jy hulle sal kry:

• Middelburg Primary School het ’n “Stadig, Paddas Oorsteek”-teken in Mandela Rylaan opgerig, wat motoriste aanspoor om nie Afrika-brulpaddas dood te ry nie. Die paddas word gereeld gesien waar hulle dikbek die pad oorsteek.
• By die Sterkfontein Gastehuis is ’n padteken wat motoriste waarsku om versigtig te ry, want daar is tarentale, hasies en uile in die pad.
• Bullerstraat met sy groot haasbevolking kort dalk ook ’n haasbord.
• Maar nouja, as daar vir die hoenders ’n padteken opgerig word wat van die seekoeie? Middelburg was in rep en roer toe ’n kalf en haar ouers die dorp se strate ’n paar jaar gelede ingevaar het.