Oë rek oor twee met borde wat sê “we need money for fishing”
Wanneer viskoors jou beetpak word daar altyd ’n plan gemaak.
’n Boer maak ’n plan, maar ’n hengelaar het ’n plan.
Lelike ding wanneer die viskoors jou beetpak.
Dan staan niks in jou pad nie, nie eers finansies nie.
En wanneer jy 16 jaar oud is, jy het viskoors en wil ’n ekstra geldjie bymekaar maak, dan voer jy jou plan uit.
Dit is presies wat Gerhard Schoombee en John Gullard vanoggend gedoen het.
Die twee wil nie die Paasnaweek heeldag sit en Minecraft speel nie, maar Middelburgdam se visse gaan teister. Maar hengel is duur en jy wil nou nie jou familie belas met jou visvangplanne nie.
Die twee het bordjies gemaak waarop daar staan “Need money for fishing” en op die straathoek in Lillian Ngoyistraat met hulle visstokke gaan stelling inneem.
Motoriste was verstom met die twee jong knape, visstok in die hand, blik in die ander en bedelbord om die nek.
En wie het gesê ons jeug is sonder ambisie, sonder planne en is heeldag besig met televisie speletjies?
