Toy Engelbrecht draf op agsteman vir die Universiteit Johannesburg teen Tukkies uit en Tjaart Joubert speel in die nommer sewe trui vir Maties teen die NWU Arende in Potchefstroom.

Alle oë gaan egter op die oud Rooi Bul van UJ, Toy Engelbrecht, wees.

Hy draf gewoonlik in die nommer ses trui uit, maar is na agsteman geskuif, om Tukkies op die LC de Villiers Stadion te pak.

Die Bokheld, Kwagga Smith, nog ’n oud HTS Middelburg leerling, het suksesvol van ses flank na agsteman geskuif vir die Bokke.

En dit is net hier waar die stryd ’n lekker kinkel kry. Ben Janse van Vuuren het van sy skouerbesering herstel en is in die nommer vier trui gekies vir Tuks.

Hy was ’n ster losvoorspeler vir Hoërskool Middelburg. Saam met hom in die Tuks span in die nommer 12 trui is nog ’n oud Rooi Bul, Christiaan Vlok.

Vergeet dat UJ verlede week met 51-22 teen Tuks verloor het. Dit is is ’n nuwe dag en ’n nuwe wedstryd.
Met die Varsitybeker, wat gekenmerk is deur verrassings, kan enigiets gebeur.

Wie sou kon dink dat Tuks drie weke gelede so byna teen die nuwelinge, Emeris, sou verloor?

Die stryd in Potchefstroom gaan titanies wees.

Die Pukke, soos hulle eers bekend was, het op hulle velle deurgeskuur teen Ikeys, 56-53.

Joubert word gewoonlik op slot ingespan, maar Maties wil duidelik meer spierkrag in die agttal hê teen ’n omgekrapte NWU Arende pak, wat deur Chaka Willemse gebrei word.

Willemse was die skare se gunsteling op die Johan van Riebeeck Stadion, toe hy voor gedraf het vir die Puma impi.

Die kragmeting skop om 16:45 af en word gebeeldsend.

Tukkies en die Universiteit Johannesburg speel om 19:00 en die wedstryd word ook op televisie uitgesaai.

Daar is vanaand ekstra motivering vir Tuks.