Daar is deesdae bykans elke naweek ’n wedren vir bergfietsentoesiaste, maar met die somer om die draai kry padfietsryers nou ook volop geleentheid om van ’n verskeidenheid wedrenne te kies.

Middelburg Fietsryklub het van sy lede wat dié naweek na die Ditsong Willem Prinsloo Museum opruk vir die Blue Diamond-fietswedren.

Die wedren begin én eindig by die museum, met deelnemers wat tussen ’n 91 km- en 65 km-roete kan kies.

’n Feesatmosfeer wag deelnemers en besoekers by die museum in die vorm van ’n biertent, kosstalletjies en ’n piekniekterrein.

Aanlyninskrywings sluit

Aanlyninskrywings sluit vanaand om middernag, maar deelnemers kan ook Saterdagoggend by die wegspring inskryf.
Inskrywings beloop R420 vir die 65 km en R520 vir die 91 km.

Die museum is op die ou Bronkhorstspruitpad geleë, sowat 5 km van die bekende Jan Ellis Garage.
Inskrywings kan op die MyActive-webblad gedoen word.