Wanneer die knieë nie meer wil saamwerk nie en die rumatiek jou opkeil, moet jy maar mooi vra dat iemand anders die trapwerk vir jou doen.

Die bejaardes van die SAVF Ouetehuis op Carolina sê hulle kan nie meer fietsry nie en doen daarom ’n beroep op dié wat nog kan trap om die Kragtrap, wat ten bate van die tehuis aangebied word, te ondersteun.

Afhanklik van ander inkomstebronne

Dit is algemeen bekend dat die regering se bydraes tot fasiliteite soos ouetehuise al hoe minder word, wat hulle toenemend van ander inkomstebronne afhanklik maak. Die Kragtrap speel daarom ’n belangrike rol om te verseker dat dié tehuis sy deure kan oophou.

Die Kragtrap-bergfietswedren vind op 10 Oktober vanaf 07:00 by die Suikerbosfontein-voetslaanpad plaas. Die roete strek deur die Doornkop-vis- en wildlewe-terrein.

Deelnemers kan kies tussen ’n 10 km-roete (R80), 30 km (R120) en 55 km (R180).