KYK: Wanneer die rib jou in die nag wakker hou
Daar is gebraai, beoordeel en geesgevang terwyl die vet spat
Wil nie weer gou ’n skaaprib in die oë kyk nie.
Om die waarheid te sê, nie vir die volgende jaar nie.
Is oortuig om Saterdag die ribbraaikompetisie by Hoërskool Middelburg te beoordeel.
Is nou nie ’n Gordon Ramsay nie, maar weet darem van beoordeling.
Moes al skoonheidskompetisies, vele potjies, foto’s en stories beoordeel.
Saterdagmiddag om 15:45 aangemeld.
Die vure het al geknetter.
Het saam met mede-beoordelaars Loffie Prinsloo en Hentu Deale van stalletjie tot stalletjie gestap,
By elkeen moes die geheime sousie en speserye eers geproe word.
Daar was selfs skaapstertjies vir voorgereg.
Proe-proe.
Dans-dans op die maat van die Ribrakkers se eie KI-liedjie.
Kontrapsies om die ribbetjies te laat draai, ander om hom so skaam eenkant te laat staan en nog een het hom tussen twee klippe vasgeknyp.
Ja, kliprib!
Teen 18:00 het die beoordeling begin.
Master Chef se maai.
Daar was rib met pap, rib met slaai, rib met warm boontjies wat jou brand van kroontjie na toontjie, selfs ’n skopdop en lekker aartappelslaai.
Ons moes uitkyk vir smaak, geur, gaar, rou, voorkoms, gebrand en natuurlik spangees.
Die gaarste span het ook ’n prys gekry.
Kort-kort word daar oor ons skouers geloer.
Groot druk.
Die manne is ernstig.
Dit is amper soos voor ’n Rooi en Groen derby.
Die vet loop.
Ons proe en proe, gee punte, redeneer, skryf neer.
Die ribbetjies staan later ingeryg op die tafel.
Op ’n anner tafel lyk dit soos ’n aasvoëlkombuis, dis net bene.
Dedly Ribs, wat bestaan het uit Dicky Davel, Evert Potgieter en Dirk Kruger, het met een punt gewen. Dedly staan vir Dickey, Evert en Dirk.
Skaap Bra’s se Nick Geldenhuys, Arno la Grange en Jaco Strydom was tweede.
Ribrakkers het die beste spangees gehad. Die span was Werner Brits, Ruben Blake en Jandre Kruger.
Droom Saterdagnag van skape.
Skape sonder wol, net rib.
Skrik wakker van ’n geblêr.
Dis toe nie die skape nie.’My maag wat worstel met rib nommer 26 en brandboontjies.
’n Geblêr wat later klink soos die gebulk van ’n benoude boerbok.
KYK DIE VIDEO HIER:
(99+)Gooi hom Bokkie! Ribrakkers het Saterdag die beste spangees gehad by d… | TikTok
