Bethesda, Huis van Hoop was die nuutste slagoffer van die hekmotordiewe.

Shane du Preez (bestuurder) sê hulle het sowat ses maande gelede ’n nuwe industriële hekmotor ingesit en dit het hulle sowat R15 000 gekos.

“Hier is baie skade, die bracket het niks gedoen om hulle te keer nie. Die hekmotor was op ’n dik staalplaat vas!” Daar is ook skade aan die hek aangerig om by die hekmotor uit te kom.

Wat hom omkrap is dat daar al jare nie meer straatligte in Spoorwegstraat (Groenkol) is nie. Hy meld dat die elektriese drade al lankal uit die straatlig voor Bethesda geruk is.

Die krag het uitgeskop, waarskynlik terwyl hulle besig was om die kabels te ontkoppel. Met die krag af, het die kringtelevisiekameras ook nie gewerk nie. “Hulle het baie sag gewerk, want ek het niks gehoor nie.”

Shane het laat weet dat terwyl hy vanoggend besig was om ’n saak by die polisie te open, het daar nog mense ingekom wat net om die hoek van hom af bly in Morkelstraat. Hulle het gesê dat die diewe twee keer hul hekmotor probeer steel het en dit nie reggekry het nie, maar laasnag met hul hekmotor weggekom het.

Dagpatrollielede het laasnag uitgejaag na Karee- en Oribistraat waar die diewe by ten minste drie huise hekmotors probeer steel het.

Dinsdag in die vroeë oggendure is daar ook ’n hekmotor gesteel in Leipoldtstraat (Gholfsig).

As bogenoemde hekmotors bygetel word, beteken dit dat daar tussen 1 Januarie en 1 April ten minste 52 hekmotors in die dorp gesteel is (waarvan die Observer weet).

Die Observer is besig om ’n databasis saam te stel van hekmotors wat in die dorp gesteel word. As ons nog nie van jou weet nie, stuur jou naam en van, adres, wanneer die hekmotor gesteel is en watter tipe hekmotor dit is, na 072 248 3855.