’n 39-jarige vrou wat by die Emfuleni Plaaslike Munisipaliteit (ELM) werksaam was, is gister vyf keer in die kop geskiet in wat owerhede vermoed ’n geteikende aanval was. Dit is die derde voorval in ’n week in Gauteng waarin vroue skynbaar doelbewus geteiken en geskiet is.

Mani Rantsofu se dood kom op dieselfde dag waarop ’n onbekende vrou van Bedfordview drie keer geskiet en kritiek beseer is, en ongeveer ’n week nadat die Krugersdorpse prokureur Chinette Gallichan in die Johannesburgse middestad doodgeskiet is, berig Vaalweekblad.

Rantsofu (39) is gistermiddag, in wat blyk ’n geteikende sluipmoord te wees, helder oordag in Frikkie Meyer-boulevard, Vanderbijlpark, doodgeskiet.

Luidens voorlopige inligting van ooggetuies asook bronne in die munisipaliteit, het Rantsofu by die onderneming gewag toe ’n onbekende man haar trompop genader en haar sonder waarskuwing in die kop geskiet het.

Vlugmotor gesoek

Die skieter het na die aanval na ’n wagtende motor, ’n blou Volkswagen Polo, gehardloop en weggejaag. Daar is nie duidelikheid of iemand anders die motor bestuur het nie.

Hoewel die sekuriteitskameras by die toneel ongelukkig onduidelike beelde vasgelê het, het ’n bron uit die munisipaliteit wat nie genoem wou word nie, gesê hulle hoop dat naburige ondernemings of sekuriteitsfirmas in die besige omgewing waardevolle beeldmateriaal van die moord en die vlugmotor kan verskaf.

Slagoffer was ’n ‘pragtige jong vrou’

Die oorledene was ’n bekende personeellid by ELM se finansiële afdeling. Sy was daagliks in kontak met die publiek waar sy inwoners gehelp het met die munisipaliteit se skuldafskrywingsprojek.

“Dit is ’n tragiese verlies. Sy was ’n pragtige jong vrou, van binne sowel as buite. Sy was reeds meer as 10 jaar ’n gewaardeerde werknemer by ELM. Ons is platgeslaan,” sê Hassan Mako, Lid van die Burgemeesterskomitee vir Finansies.

Sy was enkellopend en het geen kinders gehad nie.

Mako is ook van mening dat dit blyk ’n berekende aanval te wees. Daar is nie gemeld dat enigiets gesteel is nie en die aanvaller het reguit op sy teiken afgestuur.

“Daar is egter onsekerheid of die moord werksverwant of persoonlik van aard is. Ons moet vertrou dat die SAPD die saak noukeurig sal ondersoek en antwoorde sal vind,” sê Mako.

Daar is uitgereik na die polisie vir kommentaar, maar dit is nie teen die tyd van publikasie ontvang nie.

Derde voorval in ’n week

Op dieselfde dag wat Rantsofu vermoor is, is ’n vrou drie keer geskiet in wat blyk ’n geteikende aanval te wees naby ’n N3-onderbrug in Bedfordview. Sy is in ’n kritieke toestand in die hospitaal opgeneem en die motief vir die aanval is steeds onbekend.

Verlede Maandag is die 35-jarige prokureur van Krugersdorp, Chinette Gallichan, doodgeskiet op pad na ’n vergadering by die Kommissie vir Versoening, Bemiddeling en Arbitrasie in Foxstraat in die Johannesburgse sentrale sakegebied. Sy is na bewering deur haar aanvallers agtervolg en die nasionale media het wyd berig dat die moord die kenmerke van ’n geteikende aanval gehad het.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.