Na herevaluering het die situasie by Vaaldam sedert vanoggend verander en is die belsuit geneem om vanmiddag 16:00 ‘n sesde heksluis by dié dam oop te maak. Dit volg nadat daar vanoggend reeds ‘n vierde sluis oopgemaak is, en toe om 14:30, vroeër as wat aanvanklik beplan is, ook ‘n vyfde sluis.

Watervlakke van die Vaalrivier het drasties gestyg sedert gisteraand met swaar reën en verhoogde invloei in die Vaalrivierstelsel met talle strome en riviere wat in vloed is.

Uitvloei by Bloemhofdam word ook drasties verder verhoog om 17:00 na 2 000 kubieke meter per sekonde.

In Parys is die Vaalrivier se water reeds oor die laagwaterbrug na Gholfeiland en is ook die Schoemansdrift-brug in die Vredefort Koepel reeds vanoggend gesluit vir verkeer. Vloei by die Schoemansdrift-brug is vanmiddag voor 14:00 al gemeet teen 1 879 kubieke meter per sekonde.

Weens die verhoogde uitvloei by Vaaldam en  nog water wat van strome invloei sal water nou vry vloei by Barrage is om 16:47 gesê. Vryvloei beteken dat al Barrage se sluise oopgemaak word sodat wat invloei kan uitvloei.

Wanneer heksluise by die Vaaldam oopgemaak word, neem dit ‘n paar uur voordat die effek daarvan in Parys gesien word, en kan Parysenaars verwag dat die water van die Vaalrivier nog aansienlik gaan styg oor die volgende ure.

Die effek hiervan kan reeds by eiendom in laagliggende dele binne die volgende ses ure moontlik gesien word veral eiendom wat in die verlede al in vloedtoestande geraak is.