Twee gevalle van hondevergiftiging is gister alleen in Parys se dorpsgebied aangemeld.

Hondevergiftiging hou dikwels verband met misdaad soos ook hier gesien is. Misdadigers het toegang tot die DBV-perseel gekry, vermoedelik in ‘n poging om die DBV se bakkie te steel. Die verdagtes het Russians met Temek (Two Step) in van die hokke gegooi, naaste aan waar hul toegang gekry het tot die perseel, maar kon DBV-personeel gelukkig vinnig optree.

Die tweede geval was in Frolichstraat (naby die brandweer) waar dieselfde modus operandi gebruik is met Russians met Temek wat in die erf gegooi is.

Honde-eienaars word gewaarsku om bedag te wees hierop, want die uitkoms van gevalle van hondevergiftiging is dikwels nie goed nie.

Gaan deur jou erf en maak seker daar lê nie vleis of ander voorwerpe wat verdag is nie. Hou jou troeteldiere waar moontlik by jou. Sou van jou troeteldiere gif inkry, neem dadelik al jou ander troeteldiere in die huis in om te voorkom dat hulle ook moontlik van die gif inkry wat dalk nog in die erf kan lê. Monitor hulle vir enige simptome.

Simptome van vergiftiging wissel na gelang van watter gifstof ‘n dier sou inkry, maar kan simptome insluit diarree, braking, skielike swakheid, of selfs rukkings.

Die beste raad is om die dier onmiddellik by jou naaste veearts te kry sou jy vermoed die dier het gif ingekry.

Jy kan geaktiveerde steenkool wat by apteke beskikbaar is as voorsorgmaatreël in geval van nood vir jou troeteldiere in die huis hou.

Die geaktiveerde steenkool help om die gif te absorbeer, en dan uit te skei. Dit help ook om opname van die gif in die dier se lyf te verminder, maar dit is steeds belangrik om dadelik professionele hulp te kry.