Kollegas eers vermis – nou vir diefstal aangekla
Daar is wyd en syd na die mans gesoek toe hulle as vermis aangegee is nadat hulle spoorloos verdwyn het.
Die twee Klerksdorpse kollegas wat aanvanklik vermis was, en toe deur die polisie in Klerksdorp, met die hulp van waaksame gemeenskapslede ongedeerd in Kempton Park opgespoor is, sal op 18 Augusts weer voor die hof in Klerksdorp verskyn.
Christiaan van Blerk (34) en Donovan van der Walt (25) is aangekla van diefstal van ‘n motorvoertuig en kontant, het polisiewoordvoerder kolonel Adéle Myburgh bevestig.
Myburgh het ook bevestig dat die mans steeds in aanhoudig is nadat hulle op 7 Augustus in hegtenis geneem is, en op 8 Augustus vlugtig in die Klerksdorpse landdroshof verskyn het.
‘n Soektog na die twee is landwyd van stapel gestuur nadat hulle op 14 Julie spoorloos verdwyn het. Hulle was die betrokke oggend nog by hul werksplek by Afrikaner Plot in Meiringspark, Klerksdorp gesien.
Die mans het die perseel verlaat in ’n maatskappyvoertuig – ’n wit Toyota Hilux Raider-bakkie, om onderdele in Klerksdorp Industria te gaan haal. Hulle het egter nooit teruggekeer nie en is hulle deur hul werkgewer as vermis aangemeld.
