Die Parys Ope-muurbaltoernooi wat oor die naweek van 24-26 Oktober plaasgevind het, het weer eens bewys waarom Parys as een van die gewildste sportbestemmings in die streek beskou word. Spelers van regoor Suid-Afrika het aan die byeenkoms deelgeneem, met verteenwoordiging uit onder meer ook Gqeberha en Bloemfontein.

Die toernooi het uitstekende sportmanskap en ‘n hoë standaard van spel opgelewer, met baie opwindende oomblikke vir die toeskouers.

In die Damesafdeling het plaaslike talent oorheers met Parysenaars wat die top drie plekke ingepalm het:
• 1ste plek: Elske Garbers
• 2de plek: Vivienne van der Schyff
• 3de plek: Reese Thompson

Die eindstryd tussen Elske en Vivienne was van die hoogtepunte van die naweek, met beide spelers wat hul vaardigheid en vasberadenheid ten toon gestel het.
Elske het uiteindelik as welverdiende wenner uit die stryd getree.

Ook in die Mansafdeling is spel van hoë gehalte gesien:• 1ste plek: Reuel Videler (PUK)
• 2de plek: Tremayne McDonald (Bloemfontein)
• 3de plek: Philip Terblanche (Mittal Klub)
Die wedstryde was gekenmerk deur sterk kompetisie, tegniese spel en goeie sportmangees — ‘n ware toonbeeld van muurbal van die hoogste gehalte.

‘n Groot sukses vir Parys

Die Parys Ope 2025 was ‘n groot sukses en het nie net die plaaslike muurbalgemeenskap saamgebring nie, maar ook nuwe vriendskappe en sportverhoudings gesmee.

Die organiseerders het hul dank uitgespreek teenoor die spelers, ondersteuners en borge wat die geleentheid vanjaar moontlik gemaak het.

Met die sukses van die toernooi sien almal reeds uit na die Parys Ope 2026, wat belowe om nóg groter en beter te wees.