Die 77-jarige Siemon Kleinhans, bekende haarkapper van Parys, is tans in die sorgeenheid van die Najaarsrus Tehuis vir Bejaardes waar hy ‘n moeilike pad met terminale prostaatkanker loop wat twee jaar gelede by hom gediagnoseer is.

Menige Parysenaars het vir Siemon oor jare as haarkapper leer ken waar hy saam met Benji destyds by Salon Maison Mia, skuins oorkant die ou Roodt-apteek gewerk het. Daarna het hy sy eie salon, Hair by Us, in vennootskap met Magda Stone begin.

Deur die jare was Magda en haar man, Martin, ware steunpilare vir Siemon selfs nadat die kanker by hom gediagnoseer is.
Siemon benodig voltydse versorging. Beide sy ouers en ander sibbes in die gesin is oorlede.

Met stygende lewenskostes en Siemon wat geen inkomste het behalwe sy Sassa-pensioen en ‘n skrale annuïteit, is sy versorging die afgelope twee jaar moontlik gemaak danksy mense wat hul harte vir Siemon oopgemaak het, vertel Shams Muller, wat oor jare saam met die Stone-egpaar ‘n hegte vriendskapsband met Siemon behou het.

Muller sê daar is diep dankbaarheid vir elkeen wat hulle oor Siemon ontferm het die afgelope twee jaar, in besonder sy susterskind, Johan en Rita van Zyl, en Debbie en Giel Pieterse vir hul omgeeharte vir Siemon, asook Elbé Ferreira en die personeel van Najaarsrus.

Mense wat graag ‘n finansiële bydrae vir Siemon se versorging wil maak, kan Najaarsrus kontak by 056 817 7343.