Petro Nel is die Maart-wenner van die Bybelblokraai-kompetisie wat maandeliks deur AGS Sion-gemeente in samewerking met Parys Gazette aangebied word.

Petro, ‘n wiskunde-onderwyser by Parys Christelike Skool, vertel dat sy nog nie vantevore ‘n blokraai voltooi het nie. Omdat sy graag Bybelstudie doen, was dit haar motivering om in te skryf.

Groot was die verrassing toe sy die oproep kry dat sy die wenner is van die boek, Die Christen se reis na die ewigheid, geskryf deur Johan Bunyan.

Die vraag in die blokraai wat haar die meeste laat kopkrap het, was: Watter profeet hang tussen hemel en aarde aan een lok van sy hare? Die antwoord was Esegiël.

Kyk uit vir die volgende Bybelblokraai in die Gazette-uitgawe van 24 April. Om in te skryf is so maklik as om die blokraai te voltooi, ‘n foto daarvan te neem en te WhatsApp na die nommer wat in die Sion-advertensie gegee word.