Vir jare het die nie-winsgewende organisasie MooiParys gehelp om Parys skoon te hou en mooi te maak. Week na week is vullis opgetel in die dorp se hoofstraat kort voor die naweek wanneer besoekers dié Vrystaatse dorp se gasvryheid kom geniet.

‘n Projek is saam met Parys Info aangepak vir kleurvolle, en kunstige vullisdromme, waarop van die dorp se plaaslike kunstenaars hul talent gewys het. In 2023 het die speelpark in Eerstelaan ‘n nuwe baadjie gekry toe daar mooi gemaak is. Daar is verskeie kere gehelp om die dorp se ou begraafplaas skoon te maak, gemeenskapsskoonmaakprojekte gehou saam met ander organisasies, dorpsingange verfraai en blomme geplant saam met inwoners wat hand bygesit het, en selfs gedroom van ‘n projek om die dorp se sypaadjies te herstel en blombakke hier te plaas.

Vir ses jaar is daar ‘n verskil gemaak in die dorp, maar MooiParys het aan die einde van ‘n lang en mooi pad gekom. Weens gesondheidsredes en kwynende fondse om die projek aan die gang te hou, het Braam Cilliers deur wie se inisiatief die projek begin is, die moeilike besluit moes neem om halt te roep met MooiParys se werksaamhede.

Die gedagte het in 2020 tydens ‘n vergadering by hom pos gevat om te begin met ‘n dorpskoonmaakprojek wat maklik van die grond af gekry kon word.

Weens Covid moes die projek vir ‘n kort rukkie op ys gesit word, maar het Braam toe uit eie sak die bal aan die rol gesit. Ander het met geesdrif begin ondersteun, en is die Ngwathe Warriors as nie-winsgewende organisasie begin.

Later is die naam MooiParys aangeneem, en is daar volstoom gewerk om ‘n verskil te maak wat deur menige besoeker aan die dorp raakgesien is, wanneer opgemerk is hoe skoon die strate is.

Baie het Braam se hand sterk gemaak – hetsy deur gereelde bydraes, of skenkings van toerusting. Ander soos Paul Noome, Stephanie Fourie en Hannelie Cloete-Van Heerden het help mooi maak veral by die dorpsingange.

MooiParys het ook ywerig gewerk om die dorp te bemark vir die Kwêla Dorp van die Jaar kompetisies.
Maar MooiParys was ook meer as ‘n dorpskoonmaakprojek. Dit het brood op die tafel gesit vir ses tot agt mense die afgelope jare.

Ongelukkig het bydraes vir die projek nou grotendeels opgedroog en bly mense mors op oop terreine en met vullissakke wat te vroeg uitgesit word en dan sakgrawers lok.

Om die dorp op ‘n Vrydag te kon skoonmaak het tot R600 aan arbeid en sakke in die verlede gekos.
Geld wat daar nie meer is nie, en werk wat nou nie meer verskaf kan word nie.

Braam het egter dankbaarheid in sy hart vir elkeen wat die afgelope ses jaar gehelp, bygedra en ondersteun het, ook die Ngwathe Munisipaliteit se vullisverwyderingspan wat deurentyd hul kant bring. MooiParys het ‘n verskil gemaak!

Indien daar iemand sou wees wat graag die projek wil voortsit kan Braam gekontak word by 072 779 4079.

Die foto’s hieronder gee ‘n beeld van enkele van die projekte waarby MooiParys die afgelope jare betrokke was.