‘n Sakeman en sy maatskappy moet gesamentlik die Nasionale Departement van Indiensneming en Arbeid met ‘n bedrag van R201 812,36 vergoed, nadat die Heilbronse landdroshof Ente Thibello Sekhoto (51) en sy maatskappy, Batlokoa Circle 12 Plaster Services (Edms.) Bpk skuldig bevind het aan bedrog en geldwassery wat verband hou met die Covid-19 Tydelike Werknemer-verligtingskema (TERS).

Die vergoedingsbedrag moet binne vier jaar vanaf die datum van die bevel betaal word, het die hof Woensdag (13 Mei) gelas.

Sekhoto het gedurende 2020 op bedrieglike wyse aansoek gedoen vir voordele ingevolge die Tydelike Werknemer-verligtingskema (TERS) namens sogenaamde werknemers wat nie deur die maatskappy in diens was nie. Gevolglik het die Werkloosheidsversekeringsfonds (WVF) ’n bedrag van R201 812,36 in Batlokoa Circle 12 Plaster Services (Edms.) Bpk. se rekening inbetaal.

Nadat die bedrog aan die lig gekom het, het die Valke se Eenheid vir Ernstige Kommersiële Misdaadondersoeke in Welkom die saak ondersoek wat gelei het tot die inhegtenisneming van Sekhoto.