Skuins voor sonopkoms het die dorp lewe gekry. Laaste reëlings wat gefinaliseer is. Almal op hul pos, want elke jaar kry dié straatmyl dit reg om mense bymekaar te bring in die Vrystaatse dorp, Parys.

Mense kom van heinde en ver om deel te neem aan die Parys Crater Street Mile. Kinders, besighede, vriende, familie, gesoute atlete, dié wat sommer net besluit het om die pretuitdaging aan te pak, en ander wat jaar na jaar kom aantree by die wegspring. Mense soos die 82-jarige Bobby de Kock van Kroonstad wat vanjaar weer die straatmyl voltooi het.

Dit is ‘n myl wat deursettingsvermoë wys wanneer daar tot die einde volhard word. Mense wat spontaan langs die die sypaadjies aanmoedig.

Dis ‘n dorp-ding wat mense saambring, Dis saamwerk om die dag moontlik te maak. Dis uitstaande talent wat sorg vir rekords, maar dis ook vir die dorp se toerismebedryf ‘n lewensaar.

Vanjaar is die vierde jaar wat die Parys Crater Street Mile deur Parys Rotary in samewerking met Parys Info & Tourism, en onder die vaandel van Parys Multisport aangebied is. Maande se beplanning is deur Rotary president Sandra Uys en haar span in die dag ingesit. ‘n Span van raakvat hande wat van vroegoggend totdat die laaste verpligting vir die dag afgehandel was, ingespring het om te doen wat nodig was.

Honderde atlete en hul families wat weer kon sien hoe Parys se hoofstraat in ‘n oogwink verander het in die aksie en opwinding van ‘n wedloop, hier in die platteland met sy gasvryheid wat elkeen wat deel was hiervan, omarm het.

‘n Pluimpie ook vir Antonio Farmer wat die kommentator vir die dag was, en gladdebek Ockert van Schalkwyk agter die mikrofoon, asook elke borg wat die dag moontlik gemaak het.

Elite wenners:

Die Elite dameswenner was Karabo More wat vir Boxer atletiekklub hardloop, en die Elite manswenner Amogelang Tatai wat in die kleure van die NWU Pukke gehardloop het. Beide het daarin kon slaag om die vorige rekords te laat spat.

Altesaam R81 000 se prysgeld was vanjaar op die spel vir die Parys Crater Street Mile.