Wêreld-Alzheimerdag word elke jaar op 21 September gevier om bewusmaking te skep oor Alzheimer se siekte en ander vorme van demensie.

Die dag word ook jaarliks by Sally Martin Park se Wanderers Village gedenk, waar geen moeite ontsien word om hierdie inwoners en hul families op die hande te dra. Vanjaar was geen uitsondering nie, en is roosbome deur mediese diensverskaffers wat betrokke is by hierdie pasiënte geskenk en geplant, waarna die inwoners self ook saam met hul families, pers Petunias kon plant as simbool van nuwe lewe.

Die dag het ruimte geskep vir saamwees, en was die boodskap van omgee in persskakerings oral sigbaar. Van die pers balonne en versierings, tot personeel, almal geklee in pers, wat ‘n spesiale erewag gevorm het met borrels wat geblaas is vir die inwoners en hul famlies. Daarna was dit tyd vir nog bederf met tee en heerlike verversings.

‘n Besondere oomblik was toe inwoners met verf hul hande kon afdruk op T-hemde wat spesiaal geskenk is vir die doel, en vir familielede ‘n herinnering gegee het aan die kosbare saamwees wat op dié dag hier beleef is.

Een van die versorgers het met die idee vir die handafdrukke na vore gekom.