’n Vol veld van 144 spelers het Woensdag, 7 Oktober op die Parys Golf & Country Estate-baan saamgedrom vir die AGS Sion-gemeente se eerste gholffondsinsamelingsdag.

Die sportdag, wat ook voortaan ‘n instelling sal wees, het 36 vierballe opgelewer wat in ’n gees van gesonde kompetisie en samehorigheid afgeslaan het.

Die doel van die dag was om fondse in te samel vir Sion se nuwe kerkgebou, wat beplan word om in 2027 gebou te word. Die plaaslike gemeenskap het hul harte wyd oopgemaak, en danksy die ongelooflike vrygewigheid van plaaslike besighede en inwoners was daar ’n groot verskeidenheid pryse vir deelnemers op die spel.

“Ons is oorweldig deur die wonderlike opkoms en die reuse-ondersteuning van ons spelers, borge en die hele gemeenskap,” sê die reëlingskomitee. Om 36 vierballe op die baan te hê, is ’n groot voorreg. Die fondse wat ingesamel is, bring ons ’n stewige stap nader aan die bou van ons nuwe  ouditorium in 2027, en ons sê vir almal baie dankie.”

Die dag is op ’n hoë noot afgesluit met ’n gesellige prysuitdeling waar die topspelers beloon is en die gemeenskap gevier is vir hul unieke bydrae tot hierdie droomprojek.