Vanjaar word besoekers egter aanbeveel om nie die R59 tussen Viljoenskroon en Bothaville te ry nie aangesien die pad tans herbou word en hoewel daar bane aan weerskante van die pad geskraap is, word dit sterk aanbeveel om eerder ander toegangsroetes te kies, sê mnr. Cobus van Coller, voorsitter van die Oesdagkomitee. Die R76 tussen Kroonstad en Viljoenskroon word ook nie aanbeveel nie.

Besoekers wat van Parys op die R59 na Viljoenskroon ry, word aanbeveel om by die vierrigtingstop by Viljoenskroon regs te draai op die R76 en dan te ry tot by die T-aansluiting. Draai dan links op die R30 na Nampo en Bothaville.

Ander roetes wat aanbeveel word sluit in die N12 van Potchefstroom na Klerkdorp en van daar die R30 na Bothaville. Mense wat van Kroonstad se kant af ry kan die R34 na Welkom gebruik. Draai na ongeveer 15km regs op die R713 tot by die R30 en dan weer regs na Bothaville en Nampo.

Mielie-Hop Pendeldienste is beskikbaar vir besoekers wat tussen Bothaville en Nampo Park beweeg asook tussen Nampo en Potchefstroom, Klerksdorp, Bloemfontein of Welkom. Pryse word deur die afstand en aantal passasiers bepaal.