Die lyk van ‘n 11-jarige dogtertjie is Vrydag (5 April) in ‘n puttoilet naby Zeerust gevind.

Volgens Kapt. Aafje Bothma, polisiewoordvoerder, is Tlhalefo Mego (11) Woensdag (3 April) as vermis aangemeld. Die polisie, in samewerking met lede van die gemeenskap het vir drie dae onverpoos na haar gesoek.

Die soektog het uiteindelik tot dié gru-vonds gelei. Daar word beweer dat Mego verkrag en vermoor is waarna haar lyk in die puttoilet gegooi is.

Twee mans, onderskeidelik 24 en 25 jaar oud, is ook Vrydag in hegtenis geneem. Beide is van moord en verkragting aangekla. Die twee sal na verwagting vandag in die Lehurutshe Landdroshof verskyn.

Gen-Maj. Ryno Naidoo, waarnemende provinsiale kommissaris, het sy skoks oor die voorval uitgespreek.

“Die polisie sal alles in hulle vermoë doen om seker te maak dat die beweerde moordenaars vir hulle dade boet,”

Naidoo het polisiebeamptes bedank vir hulle harde werk.