VANDERBIJLPARK. – Die drie verdagtes in die Amy’Leigh de Jager ontvoeringsaak Tharina Human (27), Pieter Jacobus van Zyl (50) en Laetitia Nel (40) is steeds in aanhouding en sal eers op 1 Oktober weet of borgtog toegestaan gaan word.

Hulle word aangekla van ontvoering en afpersing. Amy’ Leigh is Maandagoggend 2 September voor die Laerskool Kollegepark ontvoer.  Die ontvoerders het ‘n losprys van R2 miljoen geëis, maar Amy’ Leigh is 18 uur later ongedeerd met haar ouers herenig.

Human wat ‘n graad RR-onderwyser by die Laerskool was ten tyde van die ontvoering, word beweer om die meesterbrein agter die ontvoering te wees. Tydends Vrydag 20 September se hofsitting in die Vanderbijlpark-landdroshof het ‘n emosionale en verwese Nel se skouers ruk terwyl sy sag gesnik het. Van Zyl het deurentyd kop onderstebo gesit terwyl Human voor haar uitgestaar het.

Tharina Human (27) die vermeende meesterbrein agter die ontvoering van die 6-jarige Amy’Leigh de Jager verskyn in die Vanderbijlpark-Landdroshof op aanklagte van ontvoering en afpersing. Foto’s: Ettienne van Rensburg