‘n Gru-toneel op die N1 sowat 100m van die Koppies-afrit, het Dinsdag 2 Februarie nie net die lewens van twee mense ge-eis nie, maar is ‘n nooddienswerker dood en ses nooddienswerkers  beseer in ‘n sekondêre botsing terwyl hulle nog besig was om hulp te verleen op die aanvanklike botsingstoneel.

Die eerste ongeluk het net voor 12:00  gebeur toe ‘n Sedan motor in swaar reën met ‘n vragmotor gebots het. Met die impak van die botsing is die voertuig in twee geskeur en het ‘n gedeelte van die motor onder die vragmotor beland. Die vragmotorbestuurder is nie beseer nie.

Nooddienste het na die toneel gehaas waar ‘n terugrol insleepvoertuig van Prinsloo Recoveries moes help om die vragmotor te lig sodat die insittenders van die motor uit die wrak gehaal kon word.

Skaars ‘n uur en half later terwyl die brandweerdiens van Kroonstad, Ngwathe se reddingsvoertuig, SAPD-lede, die polisie se forensiese deskundiges, provinsiale verkeer, die Vrystaatse provinsiale ambulansdiens en N1 Route Patrol nog op die toneel besig was, het ‘n aankomende  vragmotor deur die ongelukstoneel gebars en die Ngwathe reddingsvoertuig, brandweervoertuig, dubbelkajuit bakkie van die polisie se forensiese diens, die insleepvoertuig, verkeer en N1 Route Patrol voertuie getref.  

In die chaos wat in hierdie oomblik losgebars het, het nooddienswerkers angstig hulp na die toneel ontbied op noodgroepe.

Paramedici van Intensive Medical Rescue, Netcare, ER24, EMS Chaplaincy & Trauma Support,  Community Care, Vrystaat Nood Mediese Dienste, Vaal Emergency Services en Community Care het hulp op die toneel verleen om die ses beseerde nooddienswerkers en beseerde bestuurder van die vragmotor wat teen die noodvoertuie gebots het, na die Vaalpark, Emfuleni en Boitumelo hospitale onderskeidelik te vervoer.

Ses van die beseerdes se toestand is ernstig terwyl die sewende beseerde ligter beserings het.  

Roerende tonele op die botsingstoneel waar nooddienswerkers mekaar vertroos het. Foto: Community Care.  

Naas die twee insittendes van die voertuig wat in die eerste ongeluk noodlottig beseer is, het ‘n nooddienswerker ook in die sekondêre botsing gesterf.

Die pad is net na 21:00 weer vir verkeer oopgestel nadat dit ure lank gesluit was vir opruimingswerk op die botsingstoneel.    

Ons innige medelye met die familie en gesinne van hulle wat gesterf het.