Alle kontakklasse vir studente van die NWU se Potchefstroom-kampus word Maandag 15 April hervat.

Probleme met watertoevoer in Potchefstroom en Ikageng is intussen opgelos nadat groot dele verlede week en ook oor die naweek sonder water was.

Studente het reeds van Woensdag af stelselmatig begin terugkeer kampus toe en universiteitspersoneel kan van môre, Donderdag 11 April weer terugkeer.

Verlede week se waterprobleme in Potchefstroom was te wyte aan verskeie barste op die hooftoevoerpyp tussen twee reservoirs wat Ikageng en ‘n groot gedeelte van die stad van water voorsien. ‘n Klamp is ook Saterdagaand naby die nywerheidsgebied gesteel wat nog ‘n pypbars veroorsaak het.

Die gevolg was dat die universiteit oor die naweek genoodsaak was om kontakklasse tydelik op te skort.

Teen Maandagoggend het die grootste deel van Potchefstroom egter weer water gehad.