Vroeër jare het kinders opgewonde nader gehardloop wanneer roomysverkoper Patrick Mmeko flink sy fiets getrap het in die strate van Parys. Maar nie meer nie.

Besigheid is stil, vertel hy, en wys mismoedig na sy deurgetrapte skoene.

Die 41-jarige Patrick meen dat dit die dwelmsmouse se skuld is. Hy vertel hartseer dat mense roomysverkopers nie meer vertrou nie – “hulle glo dat hulle dwelms aan die kinders sal gee,” sê hy.
Vir die afgelope 23 jaar is roomys-verkoop dit wat hy ken. Naweke is die lekkerste, vertel hy, want dan is daar baie mense wat piekniek hou en braai. Dan lyk besigheid beter, en moet hy dikwels nog voorraad gaan kry.

Hy koop sy roomys in grootmaat beduie hy.

Al is tye selfs vir hom taai, glimlag hy breed vir ‘n foto voordat hy weer sy fiets verder trap om ‘n inkomste vir die dag met sy roomyse te verdien.