Terwyl daar groot kommer is oor rioolbesoedeling in die Vaalrivier, loop die Mbeki-pompstasie in Tumahole klaarblyklik al vir drie weke oor sodat rioolwater uiteindelik in die rivier beland.
Die rede waarom die pompstasie nie behoorlik funksioneer nie, is volgens oud DA-raadslid, Saal de Jager, weens ‘n elektriese probleem wat teen Gazette se druktyd nog nie herstel was nie.
Dit beteken dat die rioolwater  onder deur die Weiveld-pad loop vanwaar dit in die Oudewerfspruit beland en dan weer in die Vaalrivier – skaars 400m bo die Parys-waterwerke se inlaat. Die waterwerke onttrek water uit die Vaalrivier vir suiwering.