. Die seun, wat anoniem wil bly, het ingestem om met die Herald oor die voorval te praat, omdat dit dalk ander leerlinge kan waarsku. Hy vertel dat die skool om 12:30 verdaag het en dat hy soos gewoonlik vir sy ma buite die skoolterrein by die hoofingang gewag het. Sy ma kon hom nie dadelik optel nie, omdat haar kar ‘n pap wiel gekry het terwyl sy in die dorp was. Sy kon hom ook nie in kennis stel nie, want haar selfoon was nie by haar nie.

“Ek het aan die oorkant van die pad onder die boom gaan sit en wag en was nie juis bekommerd nie, want ek weet my ma los haar selfoon by die huis wanneer sy inkopies doen. Ek het teen my tas gesit en was besig op my selfoon terwyl ek die verkeer en die omgewing om my dopgehou het”, vertel hy. Hy het gemerk dat daar ‘n wit Mercedes afleweringsvoertuig verder weg geparkeer was en toe die laaste voertuig omstreeks 14:15 voor die skool ry, die afleweringsvoertuig na hom toe aangery gekom het.

“Die voertuig het ‘n skuifdeur gehad en nie vensters aan die agterste deel nie, sê hy. Die bestuurder het stadiger gery en ‘n pak skyfies na my toe uitgehou en vir my gevra: “Do you want?” Die seun vertel dat hy dadelik opgestaan het toe die voertuig nader gekom het. Hy het net die man aangekyk, maar niks gesê nie. “Toe die man die derde keer vir my dieselfde vraag vra, het ek agteruit begin loop. Die man het toe die voertuig se deur oopgemaak om uit te klim, maar iets moes sy aandag afgetrek het, want hy het skielik weer sy deur toegemaak en verder aangery. “Ek het vreeslik groot geskrik en was baie verlig toe ‘n polisievoertuig ‘n rukkie later aangery gekom het”, vertel hy. Hy het in die pad gaan staan en die polisievoertuig gestop en aan die polisie vertel wat gebeur het. Hulle het by hom gebly totdat sy oom hom kom haal het. Hy onthou dat die voertuig ‘n Gauteng-provinsie registrasie gehad het.