Die DA in Ngwathe wil nóg ’n mislukte multimiljoenrand-infrastruktuurprojek by die Valke aanmeld. Hierdie keer is dit ‘n  onvoltooide 1 km geplaveide pad in Sandersville, Heilbron. Die DA sê dat die  kontrakteur van die projek klaarblyklik dieselfde persoon is wat verantwoordelik is vir die onvoltooide laevlakbrug-projek in Sandersville waaroor die DA vroeër aangedui het hy ook die Valke wil betrek by ‘n ondersoek.

Volgens die DA is die pad net geskraap en onvolledig gelaat.

Die DA beweer ook ‘n bedrag van R3 538 489.46 van die oorspronklike R6 579 580.88 is reeds aan die kontrakteur betaal , terwyl die kontrakteur die afgelope jaar geen werklike konstruksiewerk gedoen het nie.

“Met ’n oorblywende balans van R3 041 091.42 is dit duidelik dat hierdie projek ook nie voltooi gaan word nie, aangesien die kontrakteurs reeds Heilbron verlaat het en geen werk die afgelope jaar verrig is nie,” sê DA-raadslid Joseph Mbele.

Die pad wat gebou moes word, is bedoel om die twee gemeenskappe te verbind en bied ’n korter roete as om deur die dorp te beweeg. Leerlinge, veral vanaf Phiritona, gaan skool in Sandersville, en sou die pad beteken dat ouers minder aan vervoer moes betaal.

Die DA sê hy gaan navraag rig aan die munisipale bestuurder om antwoorde te kry terwyl gewag word op ‘n ondersoek deur die Valke.

“Ons eis antwoorde oor hoekom geld aan kontrakteurs betaal word sonder behoorlike toesig. Dit is onaanvaarbaar, en ons sal nie rus totdat al die fondse verhaal is en hierdie projek voltooi is nie, ” het die party benadruk.