Die immergewilde mampoerfees wat vir jare mense van regoor die land na die Willem Prinsloo Museum in Pretoria getrek het, is vanjaar vir die eerste keer vandag, Saterdag 6 Julie, by die Voortrekkermonument gehou met seremoniemeester, Pieter Koen.

Die publiek kon uitsien na 40 aktiwiteite by die fees met Boeresport, Volkspele, Boer-dra-’n-vrou en mampoer-proe waar vanjaar se kampioenskapwenners vir die beste mampoer en likeur se produkte, saam met 400 van die land se bestes, geproe kon word.

Die Tradisionele Boeremusiekklub van Suid-Afrika het ook gesorg vir groot vermaak saam met die Jakaranda Boereorkes, Voorloper Boererorkes, Kyle Bahr en orkes, en Stephaan van Zyl en Vriende.

Hierbenewens het die Suid-Afrikaanse Dierekankervereniging  vanjaar ’n tema-uitstalling gebied, en is feesgangers getrateer met ‘n skou van Bostu Boerboele, wat deel is van die Suid-Afrikaanse Boerboeltelersorganisasie (SABBS)

Die Pretoria Ou Motorklub en Hoëveld Veteraan Trekker- en Enjinklub was ook daar met hul uitstallings.