Om 100 jaar oud te word is min mense beskore, maar vir ‘n egpaar om saam-saam so naby aan die 100 jaar mylpaal te kom, en boonop 70 jaar van getroude lewe te vier, gebeur selde.
Dié voorreg is ‘n egpaar van Najaarsrus beskore, en is daar verlede week behoorlik fees gevier saam met Hugo en Sai Holtzhausen.
Hugo het op 9 Augutus 95 jaar oud geword, en vier dae later, was dit tannie Sai se beurt om haar 94ste verjaardag te vier. Volgens Elbé Ferreira, bestuurder van Najaarsrus, is dit die eerste keer in 32 jaar dat die tehuis ‘n egpaar het wat die ouderdom saam bereik.
Die groot geleentheid is met ‘n tee gevier waar die twee eregaste behoorlik getrakteer is.
Die Holtzhausens het drie dogters, van wie twee nog leef, en sewe kleinkinders. Hulle is ook al ‘n hele paar agterkleinkinders ryker.
Hugo het in Windhoek grootgeword en was ‘n loodgieter van beroep. Later het hy ook klas gegee.
Sai het in die Upington-distrik grootgeword en was ‘n snelskriftikster en kranige naaldwerkster op haar dag.
