Nog werk aan R59 se gate gedoen
Motoriste is gevra om bedag te wees op die padwerke te hou by spoedgrense en verkeerstekens te gehoorsaam.
Civil Lab in samewerking met die Central University of Technology (CUT), is tans besig met ‘n projek op die R59 tussen Parys en Sasolburg vir die herstel van slaggate, en herseel van die teervlak waar nodig. Die span het Vrydag begin en sal werk vanaf Welkom-kafee in Parys tot by Sasolburg.
Die span was vroeër in die omgewing van die vliegveld besig, het Armand Louw, toesighouer van een van die navorsings vennote van CUT, bevestig.
Die Vrystaatse Departement van Gemeenskapsveiligheid, Paaie en Vervoer in die Fezile Dabi streek het verlede week reeds begin met herstel van slaggate op dié gedeelte van die R59, en befonds ook die projek van Civil Lab en die CUT.
Die projek dien onder meer as indiensopleiding van studente van die universiteit.
Louw het gesê dat verskeie spanne as deel van die projek tans op paaie in die Vrystaat werk by onder meer Welkom, Kroonstad, Riebeeckstad en Bothaville.
Motoriste is gevra om bedag te wees op die padwerke te hou by spoedgrense en verkeerstekens te gehoorsaam.
