Die groot dorp-skoonmaak-aksie in Vredefort gebeur volgende Saterdag (12 April) wanneer dié dorp se mense moue oprol om alles skoon en mooi te maak vir Die Kruistog wat op Goeie Vrydag 18 April in dié Vrystaatse dorp gehou word.

Aanvanklik is beplan om die naweek skoon te maak, maar is dit uitgestel na volgende naweek weens die reën.

Wees volgende Saterdag om 08:00 by die kerksaal van die NG Kerk. Na koffie en ‘n lekker worsbroodjie sal die strate ingevaar word om skoon te maak.

Vanaf 10:30 begin die kruisbou-aksie by die Dinamika-gemeente in Vredefort. Kom bou jou kruis vir die Kruistog. Daar gaan hout en skroewe wees. Elke hand is nodig om te help.

Die dag word afgesluit met ‘n bring-en-braai om 13:00.

‘n Lekker vol program, maar ‘n dag om as gemeenskap saam te werk.

Selfs al woon jy nie in Vredefort nie, kom beleef wat hierdie dorp so spesiaal maak.

Wat is die Kruistog?

Met die Kruistog stap duisende mense jaarliks die 3km sirkelroete met kruise deur die strate van Vredefort tot by die dorp se sportgronde waar die Kruistog ook begin.Langs die roete is verskeie stasies wat verskillende uitbeeldings uit die lewe en bediening van Jesus voorstel.

Die Kruistog is ‘n gemeenskapsprojek, aangebied deur die gemeenskap en ter wille van die gemeenskap, om mense ‘n besondere Paasbelewenis te gee.

Deelname aan Die Kruistog is heeltemal gratis.