Foute bepaal nie jou karakter nie. Wees wie jy is, want jy is genoeg.

Met dié woorde het Gretha Wiid vroue se harte aangeraak met haar boodskap dat die wêreld jou nie definieer nie.

‘n Oggend wat die siel inspireer het met ‘n brandstofinspuiting vir elke vrouehart.
Die damesoggend waar Wiid as gasspreker opgetree het, is Saterdag by Stonehenge gehou, en aangebied deur Pretty & Pizaz.

Met kleurvolle dekor en aandag aan detail was dit ‘n oggend van bederf vir die 120 vroue wat die geleentheid bygewoon het.

Wiid het gesê dat die wêreld dikwels nie mense agter gordyne eer nie – die wie nie trofeewenners is nie. “Moet daarom nie toelaat dat die wêreld jou plat druk nie, want jy is genoeg omdat jy aanhou en nie opgee nie. Selfs in jou laagtepunte kan jy opstaan in oorwinning,” het sy gesê. Sy het ook vroue aangemoedig om stil te staan by hulself, en minder te kyk na wat die wêreld van/vir jou sê.

“Wees genadig met mekaar. Maak jou eie platforms beter sodat dit ook uitkring na ander. Vrees vir oordeel maak dat mense nie wil sê dat hul sukkel nie, maar ander het jou storie nodig,” was haar boodskap vir elke vrou.