Die baie gewilde Weiveld Rally word weer dié naweek, Saterdag 31 Augustus, vanaf 07:00 die oggend tot laat by die Boereverenigingsaal in die Weiveld-omgewing gehou.
Dit is ‘n dag vir die hele gesin met ‘n 45km plaasroete, baie kosstalletjies, braaivleisvure, musiek en lekker kuier tot laat. Moenie die avontuur misloop nie. Pryse kan gewen word. Bring gerus jou koelhouer, kom braai ‘n vleisie en klink ‘n glasie.
Inskrywings kan reeds 06:00 die oggend gedoen word waarna die motorfietse om 07:00 wegspring. Wegspringtyd vir voertuie is om 07:30. Die laaste wegspring volg om 11:00, en die “Quarter Mile” om 15:30. Die prysuitdeling sal om 17:30 gehou word.

Inskrywings vir motorfietse is R100, voertuie R50 en R50 per persoon in die voertuig.
Die “Quarter Mile” in Kaldari se mielieland is verseker die hoogtepunt en kos R100 per resies. Daar word nie gejaag op die roete nie. Die roete sluit verskeie stoppunte in waar speletjies gespeel sal word en dan voltooi moet word voordat jy verder op die roete kan ry. Elke stoppunt kondig ook ’n wenner aan waarvoor die pryse die aand in die saal oorhandig sal word.
Die dag word aangebied in samewerking met Parys-rugbyklub en Epilepsie SA se Vrystaat/Noordwes-sentrum in Parys, as fondsinsamelingsprojek vir dié twee organisasies.

Vir navrae skakel 082 881 5210.