Die Noordwes Kinderkoor gaan vandag om 13:00 hul talente by die Herfs Piekniekkonsert by Duet Gemeente in Vanderhoffpark te toon stel.

Hul het alreeds hierdie maand vir Huis Eikelaan se inwoners op Vrydag, 10 April met ‘n skitterende optrede bekoor.

Dit was vir elkeen in die gehoor ’n vreugde om te sien hoe hul koorleier Petro Coetzee en haar span, daarin slaag om ’n groep van sowat 80 woelige kinders [tussen 9 en14] met liefdevolle dissipline te omskep in ’n eenvormige spannetjie wat dit geniet om hul talente te deel.

Hoe besing mens so ’n belewenis? Met bewondering vir die vaardigheid en musikale vermoë om dit te vermag en te geniet en die gehoor te laat meelewe in die vreugde. Die program het gewissel van meertalige en vars aanbiedinge van geestelike liedere, vrolike internasionale koorstukke, aktiewe Tswana vertolkings en rustige melodiese stukke.

Hul kan sonder twyfel internasionaal deelneem en sal besonder goed vaar met hul puik afronding, dinamiek, eenvormige klank en veelstemmige styl wat mens nie sal verwag van ’n groepie kinders van hulle ouderdom nie.