Riebeeckrand se krieketspanne blink uit

Hoërskool Riebeeckrand se krieketspelers het vanjaar die liga op ‘n hoë noot afgeskop en is vasbeslote om vanjaar die botoon te voer.

Volgens die bemarker by Hoërskool Riebeeckrand, Rikus Kruger, speel dié krieketspelers 20- en 50-boulbeurtwedstryde. Die junior spanne is vanjaar nog onoorwonne in die Pro 20-reeks nadat hulle met Hoërskool Jan Viljoen, Hoërskool Monument en Randfontein High School (RHS) afgereken het.

“Die junior spelers doen werklik fantasties. Hulle het Hoërskool Monument met 44 lopies geklop en met ‘n sespaaltjie-oorwinning met Hoërskool Jan Viljoen afgereken. Verder het hulle met 20 lopies oor RHS geseëvier,” vertel Rikus trots.

Hy vertel verder dat beide hul junior en senior spanne op 17 Augustus in ‘n 50-boulbeurtkragmeting teen Hoërskool Jan Viljoen gespeel het. Die senior span het met ‘n sespaaltjie-oorwinning met Jan Viljoen afgereken, terwyl die junior span Jan Viljoen met sewe paaltjies geklop het.

“Dié spanne het op 24 Augustus teen Fochville in ‘n 50-boulbeurtkragmeting te staan gekom. Ons junior spelers het dié wedstryd met ‘n sespaaltjie-oorwinning beklink, terwyl die seniors met ‘n sewepaaltjie-oorwinning geseëvier het,” vertel Rikus.

“Ons is baie trots op ons krieketspelers en glo hulle kan beslis vanjaar se liga domineer.”