Rioolblokkasies is ‘n groot probleem in Greenhills en Ellik de Lange, DA-raadslid van Wyk 6, doen sy bes om dit op te los.
Daar is twee spesifieke rioolprobleme wat De Lange al vir byna ‘n maand lank elke dag aan die munisipaliteit rapporteer.
Volgens hom het munisipale werkers uiteindelik op Maandag, 10 September, aandag aan die probleem op die hoek van Nerinesingel en Palmlaan gegee, maar hulle het die mangat net so oop gelos en hulle het nie die gestorte riool skoongemaak nie. Die ander groot rioolprobleem in Greenhills is op die hoek van Mimosalaan en Nightingaleweg.
“Voordat die drein op die hoek van Nerinesingel en Palmlaan reggemaak is, het een van die inwoners doeke in die rioolwater opgetel. Ons het ook messe en vurke, potlode en stukke beton uitgehaal. Dit alles verstop die drein. Die rioolwater het 400m ver in die straat afgespoel voordat dit in ‘n stormdrein ingeloop het. Ek het die afstand gemeet,” het hy gesê.
Hy het ook gewaarsku dat die oop mangat ‘n veiligheidsrisiko inhou. Die gestorte riool en toiletpapier lê nog in die strate en volgens De Lange is dit die munisipaliteit se verantwoordelikheid om dit op te ruim.
Die rioolprobleem op die hoek van Mimosalaan en Nightingaleweg is steeds nie opgelos nie en volgens De Lange veroorsaak die rioolwater slaggate in die paaie.
Het jy dalk meer inligting rakende dié storie? Stuur gerus vir ons ‘n e-pos na randfonteinherald@caxton.co.za (onthou asseblief om jou kontak besonderhede by te voeg) of skakel ons by 011 693 3671.
Vir daaglikse gratis gemeenskapsnuus aan die Wes-Rand, besoek ook ons susterkoerante se webtuistes
Roodepoort Record
Krugersdorp News
Get It Joburg West Magazine
Besoek ook ons Facebook, Twitter en Instagram blaaie om jou stem te laat tel!
