‘n Droom om oorsee te dans
So verlig 12-jarige Mickayleigh Pretorius stres deur akrodans.
‘n Jong plaaslike inwoner is passievol oor akrodans en haar soepelheid wys dit.
Mickayleigh Pretorius is slegs 12 jaar oud en is onlangs as Most Outstanding Novice en Female Acrobat of the Competition aangewys tydens vanjaar se IAAASA Nasionale Kompetisie.
Haar ma, Esmé Pretorius, het vertel dat haar dogter sedert 2017 akrodans doen.
“Die gogga het haar gebyt toe ‘n atletiekafrigter se dogter aan akrodans deelgeneem het. Akro help haar om haar gedagtes van ‘n dag se skoolwerk af te sluit, gesond en fiks te bly en te leer. Dit leer haar ook vaardighede asook leierskap,” het Esmè vertel.
Mickayleigh oefen gereeld by haar huis saam met haar suster wat ook akro doen, en oefen twee keer ‘n week by Acro Dynamics.
“Dit is my droom om eendag oorsee te gaan dans. Ek wil ook ‘n dansjuffrou word soos my dansjuffrou, juffrou Anne-Marie de Villiers,” het Mickayleigh vertel.
Behalwe vir akro het haar ma vertel dat sy ook goed presteer in atletiek, landloop en netbal.
