Gemeenskapslede, saam met lede van die DA en die Gemeenskapspolisiëringsforum (GPF), het onlangs vullis in Greenhills opgetel as deel van ’n groot skoonmaakveldtog.

Volgens wykraadslid Tewie Botha is daar reeds verskeie sulke veldtogte van stapel gestuur met die doel om die strate, die Botes-ekosisteme (’n klein meer op die hoek van Tierstraat en Rietboklaan) en Riebeeckmeer skoon te maak. Hierdie inisiatief steun sterk op die vrywilligheid van inwoners.

Botha het verduidelik dat hy beplan om voor die Desember-vakansie die Botesmeer skoon te maak sodat families dit weer kan gebruik om te ontspan.

“’n Groot uitdaging is die besoedeling van die water, wat reeds daartoe gelei het dat kolonies watervoëls, geelvinke, rooivinke en visse vernietig is. Ook die kolonie paddas, waarvan ons vroeër die pragtige paddakore kon hoor, is uitgewis,” het hy gesê.