Duisende stroom na Tuinhekkie vir 2023 Vleisfees

Skaapkop, afval en krokodil op ‘n spit. Bees asook hoender-espatadas en boerbok. Moet dan ook nie vergeet van die glybane, warmlugballonritte, die teetuin of kunsuitstalling nie.

Dit, en nog meer, was alles vir die duisende besoekers aangebied wat gedurende Saterdag, 5 Augustus na die Tuinhekkie gestroom het vir die Sionspoort Hervormde Gemeente se grootste Vleisfees nog.

Organiseerders was reeds om 04:30 aan die werk om alles reg te kry vir besoekers wat sover as Hartswater in die Noord-Kaap, Gqeberha en George gekom het. Boonop was daar ongeveer 300 stalletjies van regoor Suid-Afrika (‘n groei van 230 stalletjies sedert sy bestaan in 2019) wat alles van klere, Vellies, diereprodukte soos hondejassies en komberse, handgemaakte kuns items, parfuum, tuisgebak, lekkergoed, speelgoed, leerprodukte en meer verkoop het.

“Ons was omtrent geseënd. Vanjaar se Vleisfees het al ons verwagtinge oortref en beter verloop as wat ons ooit kon droom. Die weer was ideaal, feesgangers gelukkig en daar was heerlike kos en vermaak vir almal,” het die fees se mediabestuurder Appel Ernst gesê.

Gevra wat regtig uitgestaan het, het Appel gesê, “Die ywer en entoesiasme waarmee nie-winsgewende organisasies hul plek by die Vleisfees gevind het en blootstelling vir, en geleentheid gehad het om fondse te kon genereer vir die organisasies. Natuurlik was dit ook wonderlik om te sien hoe Randfontein en omliggende areas se mense weer lekker saam gekuier en gelag het.”

Die diereuitstallings, boerboele, hoenders en optredes by die twee arenas was ook goed ondersteun en baie gewild onder feesgangers. Die vars kos was so gewild dat alle kosstalletjies teen 20:30 uitverkoop is. Verskeie skole soos Seatile, Ram, Rappies, Kwaggasrus, Noordskool, Silverfields en Westgold was by talle aktiwiteite betrokke. Bekkerskool se veeskou en die D2-laerskole pom-pom kompetisie het ook groot skare getrek. Hoërskool Riebeeckrand het ook ‘n verrassingsvertoning kom lewer om die laerskole te inspireer. Dié einste hoërskool en Wagpos het mekaar die middag uitgedaag in ‘n toutrekkompetisie. Riebeeckrand het koning gekraai en natuurlik het die feesgangers ook hul hand aan die tou kom waag wat hope pret vir almal verseker het. Van jong dogterjie-spanne tot die harde baarde het hier hul staal kom wys.

Daar was ook hope vermaak vir oud en jonk. Dit sluit in 4STRONG Fitness se vier Randfontein Obstacle Course (OCR) Racing-atlete wat hul vaardighede ten toon gestel het op die hindernisbaan in die 100 meter ‘sprint’ tydens die fees. Hulle gaan eersdaags in Genk, België aan die FISO OCR Wêreldkampioenskappe gaan deelneem. Feesgangers kon ook hieraan deelneem. Kameelritte en skyfskiet was nog ’n paar aktiwiteite wat gesorg het vir hope pret. Die komediant Doringdraad het as seremoniemeester opgetree en die gehoor gereeld laat krul van die lag.

By die hoof-arena is die feesgangers met goeie musiek vermaak en Randfontein se eie Tanya V was hier in beheer waar sy met kunstenaars soos Juan Piere Murphy, AJ Vos, Botter, Stompdraai, Gerhard Supra, Anton Botha, Van West en Bernice West saamgespan het om die gehoor met uitmuntende vertonings te bederf.

Veteraan Motors was ook op die Tuinhekkie se perseel te sien – selfs ’n ou brandweerwa. Daar was wel kopgekrap om wenners in die afdeling te bepaal maar aan einde van die dag het Piet Ferreira se Valiant koning gekraai met Boeta Graham se Pontiac in die tweede plek en Peet Wessels se GMC in derde.

Hierdie jaar kon moeë feesgangers lafenis gaan soek in die Madeliefie Teetuin, waar daar gesmul is aan, onder andere, keurig bereide quiche, wortelkoek, sjokoladekoek en melktert. By die teetuin was daar ook ‘n kleurryke kunsversameling deur Cum Laude kunsskool-studente ten toon gestel. Een van die studente/ kunstenaar aan wie hulde gebring is daar, is die ontslape eienaar van Tuinhekkie, Leon Hefer. Verskeie van sy kunswerke was ook uitgestal.

“Sionspoort en Leon se vriende het sy afwesigheid gedurende die dag oral ervaar. Hy was gedurig in ons gedagtes tydens die fees,” het Appel gesê.

“Dankie aan elk van ons besoekers vir jul ondersteuning; dankie aan ons borge vir jul oop hand en bereidwilligheid en betrokkenheid by ons projek en aan elke uitstaller, dankie dat jy die Vleisfees jou keuse gemaak het om jou produk te kom bemark. Julle is die hart van ons Vleisfees.

“Alle eer kom ons Hemelse Vader toe, Hy wat ons die krag en vaardighede maar bowenal die genade geskenk het om op ons beskeie manier, diensbaar in ons gemeenskap te wees,” het sy afgesluit.