RAM baljaar by boekkarakter-fees
Laerskool Randfontein het onlangs as onder andere Captain Jack Sparrow, Tin Man en die Queen of Hearts aangetrek ter viering van Boekkarakterdag.
Vrydag, 22 September was ‘n dag sonder teleurstelling vir die leerders van Laerskool Randfontein. Die entoesiastiese jeug het die geleentheid gekry om internasionale Leesdag en Erfenisdag saam met hul onderwysers te vier as hul gunsteling storieboek-karakters.
Laerskool Randfontein-leerders was uitgedaag om aan te trek as hul geliefde storieboek karakters. Die onderwysers het nie geskroom om by die saak aan te sluit nie en skoolhoof Leon Haupt asook adjunkhoof Steve Greyvenstein het smullekker boereworsrolletjies vir die personeellede gebraai.
Die liplek-lekker boereworsrolle was nie die enigste merkwaardige geselligheid nie. Die verskeidenheid karakterkostuums was geweldig verbysterend en die kreatiwiteit het oorgeloop. Die bepaling van die wenners was ‘n moeilike ry om te skoffel. Die wenners is elkeen beloon met ‘n geskenk van Cartridge Cave. Leon het die wenner van elke graad aangekondig en die pryse persoonlik vir hulle gegee.
Laerskool Randfontein se Boekkarakterdag was beslis ‘n jubeldag wat vir lank onthou sal word.
