Milestone vier Kersfees van samesyn en vermaak
Milestone Sentrum het die feesseisoen afgeskop met 'n bederfgeleentheid vir hul bejaardes.
Die Rand West City Library asook Laerskool Modderfontein het hande gevat om Milestone Sentrum se bejaarde inwoners met ‘n vroeë Kersfees te bederf.
Volgens Hillshaven Biblioteek se bibliotekaresse, Lydia Anne van Aswegen, het inwoners ‘n fliek gekyk en is daarna getrakteer op heerlike versnaperinge wat deur Laerskool Modderfontein geborg is.
“Hulle het die fliek baie geniet, baie gelag maar terselfdertyd gehuil,” vertel Lydia opgewonde.
Lydia het waarnemende skoolhoof Alex Reed asook Milestone en sy personeel bedank.
“Die boodskap wat ek graag wil beklemtoon is dat net soos Kersfees ‘n tyd vir samesyn en vrede is, so is die biblioteke en programme. Hierdie programme bring almal bymekaar en versprei die boodskap van lees en geletterdheid. Dit bring mense bymekaar en skep ook vrede. In ons gemeenskap is biblioteke die hart van ons gemeenskappe,” het Lydia afgesluit.
