Rappies dra blou vir diabetes

Laerskool Rapportryer het onlangs Wêreld Diabetesdag gevier deur die skool blou te maak.

Op 14 November het baie leerders sowel as skoolpersoneel ‘n ‘Dra Blou’-dag aangebied.

Onderwysers, leerders en selfs ouers het die dag gevier deur blou klere te dra, wat die amptelike kleur van diabetesbewustheid simboliseer. Die skoolterrein was ‘n see van blou, aangesien almal hul ondersteuning uitgespreek het vir diegene wat met diabetes leef.

“Ons doelwit is nie net om bewustheid te kweek nie, maar ook om ons leerders en gemeenskap toe te rus met kennis oor hierdie lewensbelangrike kwessie,” het Celeste Wentzel, skoolwoordvoerder, gesê.

“Met sulke inisiatiewe skep Laerskool Rapportryer nie net bewusmaking nie, maar ook hoop vir die toekoms – een blou lint op ’n slag.”