Laerskool Randfontein en Hoërskool Bastion se boogskietspanne het saamgespan om ’n suksesvolle Wildsfees aan te bied.

Volgens boogskietafrigter Annie Nolan, was die aand ’n groot sukses vol gees, smaak en samehorigheid.

Op 30 Augustus het ouers, onderwysers en leerders by Laerskool Randfontein bymekaargekom om die verskeie wildsvleisdisse te geniet. Annie het vertel dat die hoogtepunt die 30 geregte was wat uit 14 verskillende diere bestaan het en deur ouers voorberei is.

“Dankie vir die ruim bydraes van die skenkers van die wildsvleis. Sonder julle ondersteuning sou die fees nie moontlik gewees het nie. Julle het regtig ’n groot verskil gemaak,” het sy bygevoeg.

Behalwe vir die heerlike disse, was daar ook ’n veiling en dans wat die aand ekstra spesiaal gemaak het. Die fondse wat ingesamel is, sal gebruik word vir die ontwikkeling van die boogskietspanne en ander opvoedkundige projekte.

“Die Wildsfees het weereens bewys dat wanneer skole en die gemeenskap hande vat, gebeur groot dinge.”

Soos een ouer opgemerk het: “Dis nie net ’n fondsinsamelingsgeleentheid nie, dis ’n fees van saamwees en trots op ons skole.”