Laerskool Rapportryer het onlangs hul graad een-leerders amptelik by die skool verwelkom met hul bekende klokseremonie.

Skoolwoordvoerder Celeste Wentzel het gesê, “Die graad een-inhuldiging is ’n besondere oomblik waar ons ons jongste Rapportryers amptelik by die skool verwelkom. Die klokseremonie simboliseer die begin van hul skoolloopbaan en die oorgang van kleuters na volwaardige laerskoolleerders. Na drie weke in die roetine was dit die perfekte dag. Dit is ’n viering vol trots, opgewondenheid en betekenis.”

Sy het bygevoeg dat dit ’n jaarlikse tradisie is wat baie spesiaal is, omdat dit ’n gevoel van verbondenheid tussen leerders, ouers en die skool skep. Die inspirasie agter die seremonie is om die leerders se eerste tree by die skool besonders te maak.

“Die klok verteenwoordig ’n nuwe begin, groei en die roepstem na leer, ontdekking en drome,” het Celeste gesê.

Volgens haar was die geleentheid ’n sukses, met die positiewe energie van die dag wat tasbaar was. Die glimlagte op die leerders se gesigte en die trots van die ouers het dit bevestig. Die reën het ook net tot die spesiale atmosfeer bygedra.

“Dit was ’n oomblik wat nog lank onthou sal word. Dit was beslis die Here se seën wat op ons neergedaal het,” het Celeste bygevoeg.

Aan die graad een-leerders het sy gesê, “Welkom by Laerskool Rapportryer! Mag julle elke dag met nuuskierigheid leer, met moed groei en met vreugde speel. Onthou julle is nou deel van ons Rapportryer-familie.”

Sy het ook elke ouer en personeellid wat tot die dag bygedra het, bedank.

Sy het afgesluit deur te sê, “Die Here het ons geseën met die reën. Saam bou ons as gemeenskap aan ’n veilige, liefdevolle en inspirerende omgewing waar elke kind ’n wenner kan wees vir vandag en môre!”