Akasia-onderhoof sterf na maande in hospitaal
“Ons was baie lief vir oom Johan, hy het soveel beteken in soveel mense se lewens…”
Nuus van Akasia-onderhoof, Johan du Toit, se dood was Dinsdagoggend ’n groot skok vir vriende en familie.
Sy vrou Retha sê hy is ongeveer 05:30 vanoggend oorlede, nadat sy toestand gisteraand versleg het. Sy was langs sy bed toe hy heengegaan het.
Johan (58) is vir twee maande in Eugene Marais hospitaal onder verdowing gehou nadat hy nege keer deur inbrekers in sy Akasia-huis geskiet is.
Hy het vroeër die maand uit sy verdowing ontwaak.
In daardie stadium het sy vrou gesê: “Hy sal weer moet leer loop, praat, ens.”
Vriende het Dinsdagoggend Johan se heengaan met Rekord gedeel.
“So hartseer. Na al die weke. Maar nou moet julle berus daarby. Dit was nie in die mens se hande nie, maar die Here wat beskik,” skryf Christien Hamman Retief op Facebook.
Nog boodskappe van medelye en gebede het op sosiale media ingestroom:
Johan is op 11 Junie nege keer geskiet toe hy inbrekers in sy huis betrap het.
“Agt skote is deur sy lyf en een koeël is in die hospitaal verwyder,” het sy vrou vroeër vertel toe sy die aanval met Rekord gedeel het.
Haar man het vroeg die Saterdagoggend ’n onbekende aantal inbrekers in hul huis betrap.
Retha en haar seun, De Villiers, was tydens die skietery op die boonste vloer.
“My man het vir ons geskree: ‘Moenie afkom nie! Bly weg! Hulle is baie!’”
Retha onthou hoe ’n verdagte bo-oor haar man gestaan en skiet het, terwyl Johan op die grond gelê het.
De Villiers het met ’n wasgoedmandjie op die inbreker afgestorm om sy pa te probeer help.
Die verdagtes het gevlug en Johan is na die Eugene Marais hospitaal gehaas.
Lees ook:
Onderhoof veg teen inbrekers – veg nou om lewe
Akasia-onderhoof steeds kritiek, maar stabiel
Het jy dalk meer inligting rakende dié storie? Stuur gerus vir ons ‘n epos na editorial@rekord.co.za of skakel ons by 083 625 4114.
Vir jou daaglikse gratis gemeenskapsnuus, besoek Rekord se webwerwe:
Besoek ook ons Facebook, Twitter en Instagram blaaie.
- Ons wil hê jy moet altyd weet wat in jou gemeenskap aangaan. Stuur ‘n epos met die woorde ‘Teken aan’ na breakingnews@rekord.co.za vir jou gratis daaglikse nuusflits.
