Motordiewe slaan al hoe meer toe op Sondagoggende in die Moot-gemeenskap

’n Styging in motordiefstal en huisinbrake dui op ’n kommerwekkende toename in verdagte aktiwiteite wat Sondagoggende in Moot-woonbuurte voorkom.

Alhoewel die polisie se misdaadstatistiek wys dat motordiefstal ’n afname ervaar sedert die begin van die jaar, sê ’n plaaslike sekuriteitsmaatskappy die teenoorgestelde.

Klaas van der Kooi, stigter van Kilner Park Sekuriteit, sê daar is ’n merkbare toename van die aantal voertuie wat gesteel word gedurende die tyd wat baie inwoners kerkdienste bywoon.

Dit lyk asof misdadigers die voorspelbaarheid van roetines uitbuit. “Die skelms hou dop wie netjies aangetrek is vir kerk en teiken dan hierdie mense omdat hulle weet dat hierdie huise en voertuie vir etlike ure sonder toesig sal wees,” verduidelik Van der Kooi.

Hy sê Kilner Park Sekuriteit werk aktief saam met plaaslike polisiedepartemente om patrollies en toesig te verbeter gedurende hierdie kwesbare tye.

Daar word aanbeveel dat inwoners gebruik maak van die tegnologie wat tot hulle beskiking is.

Die installering van bewegingsensors en toesigkameras kan as beduidende afskrikmiddels teen diefstal dien.

Boonop word inwoners aangemoedig om veilige parkering te gebruik indien beskikbaar en waardevolle items uit sig te hou, wat die waarskynlikheid verminder dat hul motors geteiken word.

Plaaslike kerke, soos die Vrye Gereformeerde Kerk Pretoria-Maranata, tree ook op om die kwessie aan te spreek, deur middel van georganiseerde sekuriteitsvrywilligers vanuit die gemeente om voertuie gedurende diensure op te pas en te monitor.

Die gemeente het ook houtpale geplant wat die parkeerarea omring om sodoende te keer dat motors gesteel word.

Hierdie gemeenskapsgedrewe inisiatiewe toon ’n proaktiewe houding teen die stygende gety van Sondagoggenddiefstalle, met die doel om gemoedsrus vir gemeentes en inwoners te herstel.

Chlarissah Haoten, verkoopsbestuurder van Citi Protection, beklemtoon die belangrikheid van sekuriteitskameras om jou huis.

“Wanneer ons na sekuriteitskameras rondom jou huis kyk, moet ons weet en verstaan dat dit wonderlik is om rondom die huis te kan sien en wat by die perseel aangaan. Kameramateriaal kan alle sektore van sekuriteit en polisiëring bystaan met die identifisering van neigings en kriminele elemente.

“Ons het gevind dat kameras meer doeltreffend is wanneer dit saam met ’n alarmstelsels gebruik word. Daarom is ’n alarmstelsel in samewerking met kameras baie effektief en kan sekuriteitsverskaffers baie vinniger reageer. Dit verminder ook die kanse op inbrake,” voeg Haoten by.

Terwyl die gemeenskap saamtrek om hierdie neiging te bekamp, bly Kilner Park Sekuriteit op die voorpunt en bied hulpbronne en ondersteuning aan diegene wat geraak word.

Inwoners wat verwante voorvalle ervaar of sien, word aangemoedig om plaaslike owerhede of Kilner Park Sekuriteit direk te kontak.

Deur saam te werk, hoop die gemeenskap om hierdie vlaag misdade hok te slaan en veiligheid en sekuriteit vir al sy lede te verseker.

Lees: Centurion heart transplant recipient takes on a historic first for South Africa

Het jy dalk meer inligting rakende dié storie? Stuur gerus vir ons ‘n epos na  bennittb@rekord.co.za of skakel ons by 083-625-4114.

Vir jou daaglikse gratis gemeenskapsnuus, besoek Rekord se webwerf: Rekord

Besoek ook ons Facebook, Twitter en Instagram blaaie.