’n Man van Pretoria-oos het vanjaar die klimtog na die uitdagende Berg Everest-basiskamp in die Khumbustreek in Nepal voltooi, ’n uitdaging wat hy beskryf as ’n lewensveranderende ervaring.

“Wat my geïnspireer het om die Berg Everest-basis te bereik, was nie net om ’n item op ’n emmerskoplysie af te merk nie, maar om dieper in die ‘nou’ te leef,” vertel Francois Cilliers.

Hy verduidelik verder dat dit nie net ’n persoonlike droom was nie, maar ook ’n uitdaging wat hom uit sy gemaksones gedwing het.

Die idee het ontstaan toe sy skoonsus, Jacolene de Klerk, en haar man, Dawie, hom in 2022 genader het om die legendariese Kilimanjaro-berg in Tanzanië te klim.

“Dit was ’n avontuur en ook ’n manier om die lewe op ’n ander wyse te ervaar. Ek het na die Kilimanjaro-klimtog geweet dat daar ’n groter uitdaging op my wag, en toe hulle die Berg Everest-basis voorstel, was ek dadelik aan boord,” vertel Cilliers.

Vir iemand wat reeds ’n fiksheidsprogram volg, was die voorbereiding vir die tog nogtans geen maklike taak nie.

Cilliers hardloop normaalweg ’n afstand van 10km twee tot drie keer per week, maar vir hierdie avontuur het hy sy teikens verhoog.

Hy het spesifiek gefokus op die versterking van sy bene deur die trappe by die gym teen ’n vinnige tempo te klim.

“Ek het ook saam met vriende in Maart by Sweni in die Kruger Wildtuin gestap om seker te maak dat my stewels goed ingeloop was,” sê hy.

Vir Cilliers het die hoogtepunt van sy reis op die negende dag voorgekom toe hy die top van Kala Pattar (5 646 meter) bereik het.

“Ons het om 04:00 vertrek, en dit was vreeslik koud: -9°C. Vir twee ure het ons met min suurstof teen ’n konstante helling van tussen 8 en 18 grade na bo geklouter. Toe ek die kruin bereik het, het ek die son agter die Everest sien opkom en die asemrowende uitsigte oor die Khumbu-vallei-gletser gesien. Dit was ’n oomblik van pure uitputting en ongelooflike skoonheid,” onthou hy.

Tydens die klimtog het Cilliers ook simptome van hoogtesiekte ervaar.

Hy verduidelik: “Op die tweede dag het ons sowat 1 100m in hoogte geklim na Namche Bazaar, wat op 3 443m bo-seespieël geleë is. Ek het ’n erge hoofpyn gekry en naalde-en-spelde in my hande gevoel.”

Die akklimatisering, asook die inname van water en die gebruik van Diamox-pille, het die simptome verlig en hom gehelp om aan te pas by die hoër hoogtes.

Die reis was fisies uitdagend, maar het Cilliers die kans gegee om die plaaslike Sherpa-kultuur en die mense van die Himalajas te ervaar.

Hy het die dorpie Namche Bazaar besoek, wat op die hange van die berg gebou is.

“Namche Bazaar is ’n unieke plek. Dit is ’n dorp waar water deur klipfonteine afloop en handelaars heeltyd besig is om met ander handel te dryf op die markte. Die mense is vriendelik en gewillig om enige moeite te doen vir besigheid,” sê Cilliers.

In Tengboche het hy ’n aktiewe Boeddhistiese klooster besoek, waar monnike in ’n tempel woon en werk.

“Die klooster is versier met ongelooflike tapisserieë wat vreemde gesigte en tonele uitbeeld. Dit was ’n belewenis wat ek nie gou sal vergeet nie,” vertel hy.

Alhoewel die reis grootliks goed verloop het, was daar natuurlik ook uitdagings.

“Die grootste uitdaging was nie die fisieke aspek nie, maar eerder die gebrek aan higiëne en basiese geriewe,” sê hy.

Hy verduidelik sy dieet was hoofsaaklik vegetaries en vol koolhidrate. Vir hom as ’n Suid-Afrikaner, ook gewoond aan ander voedselgroepe, was dit ’n uitdaging.

Die ervaring het hom meer oor die wêreld geleer asook oor homself.

“Die kulturele verskille, die lang staptye, en die hoë hoogtes het my uit my gemaksones gedwing. Ek het geleer dat jy die staptog in klein gedeeltes moet opbreek en dit stukkie vir stukkie moet aanpak. Die krag van volharding is iets wat jy nie net met jou liggaam, maar ook met jou gees moet benader,” sê hy.

Vir ander Suid-Afrikaners wat die Berg Everest-basis wil besoek, het Cilliers praktiese raad.

“Die eerste stap is om die bespreking te maak. Dit gee jou die moed om met die nodige voorbereiding te begin. Maak seker dat jou skoene ingeloop is en jy klere het wat jy meer as een keer kan dra,” raai hy aan. “En moenie vergeet om jou fiksheid op die spel te sit nie. Dit sal alles die moeite werd wees.”

Volgens Cilliers is dit belangrik om die regte toerusting saam te neem.

“Ek het ’n goeie koplamp, ’n warm slaapsak, en ’n boek om in die aand te lees saamgeneem. Dit het my gehelp om na ’n lang dag te ontspan en voor te berei vir die volgende uitdaging,” sê hy.

As Cilliers die kans kry om die Berg Everest-basis weer te sien, sal hy dit beslis doen maar met een voorbehoud:

“Ek sal dit weer doen as my kinders dit wil aanpak, maar die werklike piek van Everest is ’n groot uitdaging wat twee maande se voorbereiding verg,” sê hy.

“Ek sal eerder ander bergpieke wil aanpak, soos Aconcagua in Argentinië. Die ervaring was vir my ’n reis wat my lewe verander het, en ek sou dit vir niks ruil nie. Dit was ook ’n tyd waar mens weer besef dat God alomteenwoordig, almagtig, alwetend, die enigste God is en getrou is,” vertel hy.

Het jy dalk meer inligting rakende dié storie? 

Stuur gerus vir ons ‘n epos na  bennittb@rekord.co.za of skakel ons by 083-625-4114.

Vir jou daaglikse gratis gemeenskapsnuus, besoek Rekord se webwerf: Rekord

Besoek ook ons Facebook, Twitter en Instagram en TikTok.