Die faktuurstelsel van die Tshwane Metro is hersien en herprogrammeer om te verseker dat dubbele skoonmaakheffings nie weer inwoners tref nie.

Woordvoerder Lindela Mashigo sê die Finansies, en Inligting- en Kommunikasietegnologie spanne het die stelsel suksesvol reggestel en deeglik getoets. Dit volg nadat ‘onbedoelde verkeerde toepassing van skoonmaakheffings’ op sekere munisipale rekeninge gewys het.

“Na ’n gedetailleerde tegniese hersiening en verifikasie, is die stelsel nou geherprogrammeer om te verseker dat skoonmaakheffings slegs toegereken word op eiendomme wat nie munisipale vullisversamelingsdienste ontvang nie,” sê Mashigo.

Die fout, wat uit ’n tegniese verkeerde konfigurasie binne die metro se rekeningstelsel voortspruit, is die afgelope maande geïdentifiseer.

Mashigo sê as deel van die regstellende aksie, is ’n grootmaat aanpassingsproses in Oktober toegepas, wat 11 862 rekeninge verkeerd gefaktureer het.

Hierdie rekeninge is nou reggestel en geaffekteerde kliënte sal die terugskrywings op hul November munisipale state sien.

“Kredietaanpassings vir die betrokke bedrae word in groepe verwerk en sal teen die einde van November op kliënte se rekeninge sigbaar wees,” bevestig hy.

Hy sê die metro betreur opreg die ongerieflikheid en finansiële onsekerheid wat die fout veroorsaak het en het sy waardering uitgespreek teenoor inwoners vir hul geduld en begrip deurgaans die proses.

Mashigo sê die vinnige en metodiese reaksie onderstreep die metro se vasberadenheid om te verseker dat kliënte akkuraat en billik gefaktureer word.

Om soortgelyke kwessies in die toekoms te vermy, het die metro die volgende voorkomende maatreëls ingestel:

Die metro het die stelselbevestiging en gehaltebeheerprotokolle versterk voordat fakture uitgereik word.

Dit sal roetine tegniese en finansiële oudits uitvoer om voortdurende faktuurakkuraatheid te handhaaf en personeelopleiding en interdepartementele koördinasie verbeter om onreëlmatighede vinnig op te spoor en reg te stel.

Dit het ook sy kommunikasiekanale verbeter om aan inwoners tydige, deursigtige bywerkings oor faktureringskwessies te verskaf.

“Die Tshwane Metro bly onwrikbaar in sy verbintenis tot skoon bestuur, betroubare dienslewering en finansiële integriteit,” sê Mashigo.

“Deur interne beheermaatreëls te versterk en oop betrokkenheid met inwoners te bevorder, bou die stad steeds voort op openbare vertroue in sy administrasie.”

Diegene wat steeds faktuurteenstrydighede ervaar of verdere verduideliking vereis, word aangemoedig om die metro se kliëntedienssentrum te skakel by 012 358 9999, customercare@tshwane.gov.za of die Tshwane webtuiste by www.e-tshwane.co.za te besoek.

LEES: Rolballegende vier eeu-mylpaal op die baan

Het jy dalk meer inligting rakende dié storie? 

Stuur gerus vir ons ‘n epos na  bennittb@rekord.co.za of skakel ons by 083-625-4114.

Vir jou daaglikse gratis gemeenskapsnuus, besoek Rekord se webwerf: Rekord

Besoek ook ons Facebook, Twitter en Instagram en TikTok.